સ્વાગત !

પ્રિય વાચકમિત્રો,

રીડગુજરાતી પર સાહિત્ય અને સમાચારના વિભાગો શરૂ કર્યા બાદ આજે ‘પુસ્તક પરિચય’ નામનો નવો વિભાગ શરૂ થઈ રહ્યો છે જેમાં આપ સહુ વાચકમિત્રોનું સ્વાગત છે. ગુજરાતી સાહિત્યના પુસ્તકોનો આપને સરળતાથી પરિચય મળી રહે તે આ નવો વિભાગ શરૂ કરવામાં આવ્યો છે અને મને આશા છે આપને આ વિભાગમાં ગુજરાતી પુસ્તકો વિશેની જરૂરી અને ઉપયોગી માહિતી મળી રહેશે.

મોટેભાગે એવું બનતું હોય છે કે આપણે પુસ્તકો ખરીદવા જઈએ ત્યારે એ પુસ્તકોને માત્ર ગણત્રીની સેકન્ડમાં પાનાં ફેરવીને ઓળખી શકાતું નથી અને જો આપણે માત્ર સુપ્રસિદ્ધ સાહિત્યકારોના પુસ્તકો પર જ નજર ફેરવીએ તો નવા કેટલાય સાહિત્યકારોના પુસ્તકો વાચકોના હાથ સુધી પહોંચી શક્તા નથી. બદલાતા સમયમાં મનોરંજના અન્ય સાધનોને લીધે તેમજ ગુજરાતી વાંચનના મર્યાદિત વર્ગને કારણે કયા પુસ્તક નવા આવ્યા છે, ક્યા પુસ્તક સારા છે એ બધી વિગતોથી ઘણા ઓછા લોકો પરિચિત હોય છે. પરિણામે અપ્રચલિત અને નવા સાહિત્યકારોના પુસ્તકો ખરીદવાનું કોઈ જોખમ (!) લેતું નથી. આ ઉપરાંત યાદગાર ગુજરાતી સાહિત્યની કૃતિઓ, નવલિકાઓ અને નવલકથાઓ ક્યાંથી પ્રાપ્ત થઈ શકે તેની વિગતો પણ સરળતાથી ઉપલબ્ધ થાય એ પણ એટલું જ જરૂરી છે જેથી આપણે આપણા વિદ્વાન સાહિત્યકારોનો અમૂલ્ય વારસો સાચવી શકીએ.

મારો પોતાનો એવો અનુભવ રહ્યો છે કે જ્યાં સુધી કોઈ પણ પુસ્તકનો એક લેખ વાંચ્યો ન હોય ત્યાં સુધી એ પુસ્તક ખરીદવું કે નહિ એ નક્કી કરવાનું અઘરું બની જતું હોય છે. એક જ લેખથી કાંઈ સમગ્ર પુસ્તકનો પરિચય મળી જતો નથી પરંતુ તેમ છતાં લેખકની શૈલી અને તેમાં રજૂ કરાયેલી વાંચન સામગ્રીનો સારો એવો ખ્યાલ તો આપણને મળી જ રહે છે ! આ બધા કારણનો લીધે રીડગુજરાતી પર પુસ્તક પરિચયનો આ એક નવો વિભાગ શરૂ કરવામાં આવ્યો છે.

આ વિભાગમાં જુદા-જુદા પ્રકારો પાડવામાં આવ્યા છે જેમાં અમુક સમયના અંતરે પુસ્તકોની વિગતો મૂકવામાં આવશે. આ વિગતોમાં કવિ/લેખકનું નામ, પુસ્તકની કિંમત, પ્રાપ્તિ સ્થાન, તેનું એક નાનું ચિત્ર, પ્રકાશકની વિગતો તેમજ પુસ્તકના પ્રકારનો આછો પરિચય આપવામાં આવશે. આ વિભાગની ખાસ વિશેષતા એ છે કે તેમાં મૂકાયેલા જે તે પુસ્તકમાંનો એક લેખ/કાવ્ય રીડગુજરાતીના સાહિત્ય વિભાગમાં મૂકાયેલ હશે અને તેની સીધી લીન્ક અહીં આપવામાં આવશે જેથી તે વાંચીને આપ એ પુસ્તક ખરીદવું કે નહિ તે નક્કી કરવામાં સરળતા રહેશે.

આ વિભાગ હજી પ્રારંભિક તબક્કામાં છે. જેમ જેમ અમને વાચકોના સુચનો મળતા જશે તેમ તેમ વધારે સુવિધાઓ ઉમેરતા રહીશું માટે આપ આપના સૂચનો અમને હોમપેજ પર ‘Feedback’ કલીક કરીને ચોક્કસ મોકલતા રહેશો.

સૌ વાચકોને પ્રણામ

તંત્રી :
મૃગેશ શાહ, વડોદરા